Мердігер ұйымдармен жұмыс істеу саясаты

Саясаттың мақсаты: Біз мердігер ұйымдармен ұзақ мерзімді және табысты қатынастарды қолдауға ұмтыламыз, өйткені олар операциялық қызметіміздің ажырамас бөлігі болып табылады. Мердігер ұйымдармен жұмыс істеу саясаты адалдық, ынтымақтастық және тұрақты даму қағидаттарына негізделеді.

Серіктестік және ынтымақтастық: Біз мердігер ұйымдармен әділ іскерлік тәжірибе қағидаттарына негізделген серіктестік қатынастар орнатуға ұмтыламыз. Біз олардың кәсібилігі мен сараптамасын бағалаймыз және табысымызға қосатын маңызды үлесін мойындаймыз. Біз мердігерлермен өзара құрмет пен өзара тиімділік негізінде жұмыс істеуге дайынбыз.

Қарым-қатынастағы ашықтық: Біз мердігер ұйымдармен қарым-қатынаста ашықтықтың жоғары стандарттарын ұстанамыз. Біз оларға талаптарымыз, күтілімдеріміз және ынтымақтастық шарттары туралы нақты ақпарат беруге міндеттенеміз. Сонымен қатар, мердігер ұйымдардан өз мүмкіндіктері мен ресурстары туралы шынайы ақпарат ұсынуын күтеміз.

Тиісті басқару: Біз қызметімізде сапа мен қауіпсіздіктің қатаң стандарттарын ұстанамыз. Біз мердігер ұйымдарда Asia Trans KZ қолданатын сервистің сапасы, тәуекелдерді басқару, кешенді қорғау, еңбек қауіпсіздігі және еңбекті қорғау, қоршаған ортаны қорғау және корпоративтік әлеуметтік жауапкершілік стандарттарына сәйкес келетін тиісті басқару жүйелері болуын күтеміз.

Кәсіби даярлау және оқыту: Біз мердігер ұйымдар қызметкерлерінің кәсіби даярлығы мен оқытуына ерекше көңіл бөлеміз. Мердігерлердің тұрақты оқыту бағдарламалары, соның ішінде біздің қатысуымызбен өткізілетін бағдарламалар, білім мен дағдылар деңгейін арттыруға және денсаулыққа, мүлікке, қоршаған ортаға және қоғамға келтірілетін зиян тәуекелін азайтуға ықпал етеді.

Тұрақты даму және жауапкершілік: Біз қызметімізде тұрақты даму және жауапкершілік қағидаттарын ұстанамыз. Мердігер ұйымдардан да қоршаған орта мен қоғамға ықпалын ескере отырып, осы қағидаттарды сақтауын күтеміз. Біз жобаларымызда тұрақты тәжірибелерді бірлесіп әзірлеуге және енгізуге дайынбыз.

Құпиялылық және деректерді қорғау: Біз мердігер ұйымдардың құпия ақпараты мен деректерін қорғауды қамтамасыз етуге міндеттенеміз. Біз деректерді қорғауға қатысты заңдар мен стандарттарды сақтаймыз және серіктестерімізден де осыны талап етеміз.

Тиімділікті бағалау: Біз Саясаттың тиімділігін тұрақты түрде бағалаймыз және оның жұмысын жақсарту мен қойылған мақсаттарға қол жеткізу үшін қажет болған жағдайда түзетулер енгіземіз.

Мүдделі тараптар: Біз Саясатқа қатысты мүдделі тараптардың пікірлері мен талаптарын ескереміз және сенімге негізделген тұрақты қатынастар құра отырып, олардың күтілімдерін қанағаттандыруға ұмтыламыз.

Саясаттың орындалуына ОД бағытына жауапты тұлға жауап береді.

Қарау және жаңарту: Саясат заңнамадағы өзгерістер мен Компания қажеттіліктерін ескере отырып, тұрақты түрде қаралады және қажет болған жағдайда жаңартылады.

Мердігер ұйымдарды іріктеу және бағалау тәртібі

Мердігерлерді іріктеу, рұқсат беру және кейіннен мониторинг жүргізу мақсатында Компания тартылатын көлік ұйымдарын Компанияның басқару жүйесіне интеграциялану сипатына қарай жіктейді. Компания жұмысының негізгі моделі интеграцияланбаған мердігер көлік ұйымдары болып табылады. Олар жүргізушілерін, көлік құралдарын және операциялық қызметін дербес басқарады, алайда Компания мен Тапсырыс беруші белгілеген талаптарды орындауға міндетті. Толық интеграцияланған мердігерлер немесе жүргізушілер Компанияның басқару жүйесіне нақты интеграцияланған жағдайда ғана жеке санат ретінде қарастырылады. Бір реттік тасымалдау үшін тасымалдаушыны жоспардан тыс тартуға тек ерекше жағдайларда және белгіленген ең төменгі рұқсат талаптары орындалған кезде жол беріледі.

Бір реттік тасымалдаушыны жоспардан тыс тартуға объективті қажеттілік болғанда ғана рұқсат етіледі және бұл тасымалдаушыны Компания мен Тапсырыс берушінің ең төменгі талаптарын орындаудан босатпайды. Тапсырысты бермес бұрын Компания тасымалдаушыға қолданылатын заңнаманы сақтау, қажетті рұқсат құжаттарының болуы, көлік және кедендік құжаттарды орындаушылар тізбегі бойынша беру, төтенше жағдайларға ден қою, жедел байланыстар, Тапсырыс беруші алаңдарының талаптарын сақтау, сондай-ақ одан әрі қосалқы мердігерлік шарттары мен шектеулері жөніндегі талаптарды құжатталған түрде тексеріп, жеткізеді.

Тапсырыстарды орындауға жіберілген барлық мердігер көлік ұйымдары көрсетілетін қызмет түрі, мердігер санаты, рұқсат мәртебесі және келесі бағалау мерзімі көрсетіле отырып, Бекітілген мердігерлер тізілімінде сәйкестендірілуі тиіс.

Мердігерлерді іріктеу

1.1. Автомобиль тасымалдарымен байланысты жұмыстарды орындау үшін мердігер ұйымды іріктеу қажет болған жағдайда Asia Trans KZ компаниясының ОД бағыты бойынша жауапты қызметкерлері әлеуетті мердігерлердің Компания стандарттары мен талаптарына сәйкестігін бағалауы тиіс.

1.2. Мердігерлерді іріктеу кезінде олардың тәжірибесі, біліктілігі және саладағы беделі ескеріледі.

1.3. Мердігермен жасалатын жазбаша шартта ынтымақтастық талаптары және сервистің сапасына, тәуекелдерді басқаруға, кешенді қорғауға, еңбек қауіпсіздігі мен еңбекті қорғауға, қоршаған ортаны қорғауға және корпоративтік әлеуметтік жауапкершілікке қойылатын талаптар нақты көрсетілуі тиіс.

1.4. Жазбаша шартта, шартқа қосымшада, өтінімде немесе мердігер көлік ұйымымен ынтымақтастық талаптарын қалыптастыратын өзге құжатта Компания мен Тапсырыс берушінің заңнаманы сақтау, еңбек қауіпсіздігі, кешенді қорғау, сервистің сапасы, қоршаған ортаны қорғау, жүргізушілерді даярлау, маршрутты жоспарлау, қауіпсіз тұрақ, көлік және кедендік құжаттарды орындаушылар тізбегі бойынша беру, төтенше жағдайларға ден қою, көлік құралдарының техникалық жай-күйі, тиеу және түсіру алаңдары талаптарын сақтау, сәйкессіздіктер, авариялар, инциденттер мен near miss оқиғаларын тіркеу және хабарлау, операциялық және коммерциялық деректердің құпиялылығы, тасымалдаудағы парниктік газдар шығарындыларын есептеу үшін ақпарат ұсыну жөніндегі талаптары бекітілуі тиіс.

1.5. Жазбаша келісімде тасымалдауды одан әрі қосалқы мердігерлікке беруге рұқсат немесе тыйым жеке айқындалады. Егер қосалқы мердігерлікке жол берілсе, мердігер Компания немесе Тапсырыс беруші белгілеген жағдайларда алдын ала келісім алуға және қосалқы мердігерге қауіпсіздік, сапа, қорғау, құжаттар және есептілік жөніндегі барлық қолданылатын талаптарды беруге міндетті.

Мердігердің басқару жүйелерін бағалау

2.1. Автомобиль тасымалдарын мердігерге бермес бұрын оның сервистің сапасы, тәуекелдерді басқару, кешенді қорғау, еңбек қауіпсіздігі мен еңбекті қорғау, қоршаған ортаны қорғау және корпоративтік әлеуметтік жауапкершілік жөніндегі басқару жүйелері бағалануы тиіс.

2.2. Бағалауды Asia Trans KZ компаниясының жауапты қызметкерлері немесе тәуелсіз сарапшылар Asia Trans KZ талаптарына тең немесе кемінде салыстырмалы талаптарға сәйкес жүргізуі тиіс.

2.3. Қажет болған жағдайда мердігерге оның басқару жүйелері мен жалпы қызметін тиісті деңгейге дейін жақсарту үшін ұсынымдар мен ресурстар ұсынылады.

2.4. Шарт жасасу және мердігерді тасымалдауды орындауға жіберу алдында Компания оның заңнаманың, SQAS талаптарының, Тапсырыс берушілер талаптарының және Компанияның ішкі талаптарының қолданылатын нормаларына сәйкестігін құжатталған алдын ала бағалауды жүргізеді. Бағалау нәтижесі рұқсат беру, түзету әрекеттерімен шартты рұқсат беру немесе рұқсат беруден бас тарту туралы қорытындымен ресімделеді.

2.5. Бағалау кезінде қолданылуына қарай мыналар тексеріледі: құқық қабілеттілігі және рұқсат құжаттары; сақтандыру; ADR талаптарын сақтау және қажет болған жағдайда DGSA болуы; жүргізушілердің еңбек және демалыс режимін сақтау; алкоголь мен есірткіге қатысты саясат; BBS талаптары; маршруттарды және қауіпсіз тұрақ орындарын жоспарлау; төтенше жағдайларға ден қою және жедел нөмірдің қолжетімділігі; көлік құралдарына техникалық қызмет көрсету және міндетті тексерулер; жүргізушілердің біліктілігі мен оқытылуы; Тапсырыс беруші алаңдарының талаптарын орындау; аварияларды, инциденттерді, near miss оқиғаларын және өзге сәйкессіздіктерді тіркеу тәртібі; қорғау және құпиялылық талаптары; сондай-ақ тасымалдаудан туындайтын парниктік газдар шығарындыларын есептеу үшін Компанияға қажетті деректердің болуы.

2.6. Компания интеграцияланбаған мердігер көлік ұйымдары тартатын жүргізушілерге ең төменгі талаптарды белгілейді және мердігерге Жүргізушілерге арналған нұсқаулықты немесе талаптарды береді не мердігерде Компания мен Тапсырыс берушілердің қолданылатын талаптарын қамтитын баламалы құжатталған нұсқаулықтардың болуын тексереді.

2.7. Мердігер осындай талаптардың Компания тапсырыстарын орындауға тағайындалған жүргізушілерге жеткізілуін қамтамасыз етуге міндетті. Компания талаптардың мердігерге берілгенін құжатталған түрде растайды және қажет болған жағдайда жүргізушілердің танысуы мен оқытылуы туралы жазбалардың болуын тексереді.

Қызметті бағалау шарттары

3.1. Жазбаша рәсім мердігер қызметін бағалау шарттары мен жиілігін нақты айқындауы тиіс.

3.2. Бағалау аудиттерді, стандарттарға сәйкестікті тексеруді, есептілікті талдауды және клиенттердің кері байланысын қамтуы мүмкін.

3.3. Кемшіліктер немесе сәйкессіздіктер анықталған жағдайда мердігерге проблемаларды жою жөніндегі ұсынымдар мен мерзімдер беріледі.

Клиенттердің шектеулерін ескеру

4.1. Жазбаша рәсім Asia Trans KZ клиенттері белгілеген кез келген арнайы талаптар мен шектеулерді ескеруі тиіс.

4.2. Мердігерлер мұндай талаптар туралы хабардар етілуі және оларды өз қызметінің барлық салаларында сақтауға міндетті.

4.3. Тапсырысты мердігер көлік ұйымына бермес бұрын Компания Тапсырыс берушінің қолданылатын арнайы талаптары мен шектеулерін, соның ішінде химия компанияларының қауіпсіздікке, қорғауға, сапаға, жүргізушілерге, көлік құралдарына, маршрутқа, тиеу және түсіру орындарына, құжаттар мен есептілікке қойылатын талаптарын айқындайды. Мұндай талаптар қолданылатын көлемде шартқа, өтінімге, көлік тапсырысына енгізіледі немесе тасымалдау басталғанға дейін мердігерге өзге құжатталған тәсілмен жеткізіледі.

4.4. Компания Тапсырыс берушінің маңызды талаптарының мердігерге берілгенін құжатталған түрде растайды және олардың орындалуын мердігер ұйым қызметін кейінгі бағалау кезінде ескереді.

Мониторинг және басқару

5.1. Asia Trans KZ Компания мен оның клиенттерінің стандарттарына, талаптарына және күтілімдеріне сәйкестікті қамтамасыз ету мақсатында мердігерлердің қызметіне тұрақты мониторинг пен басқару жүргізуге міндеттенеді.

5.2. Сәйкессіздік немесе қанағаттанарлықсыз нәтижелер болған жағдайда тиісті түзету әрекеттері, соның ішінде ынтымақтастықты тоқтату мүмкіндігін қарау қабылданады.

5.3. Компания барлық белсенді мердігер көлік ұйымдарының қызметіне құжатталған мониторинг жүргізеді. Негізгі талаптарға сәйкестік шарт жасасар алдында және одан кейін тәуекел деңгейін, орындалатын тасымалдар көлемін және алдыңғы бағалау нәтижелерін ескере отырып, кемінде жылына бір рет тексеріледі. Тәуекелі жоғары, қайталанатын сәйкессіздіктері немесе қанағаттанарлықсыз нәтижелері бар мердігерлер үшін жиірек бақылау белгіленуі мүмкін.

5.4. Мониторинг кезінде SQAS немесе баламалы бағалау нәтижелері, авариялар, инциденттер және near miss оқиғалары, Тапсырыс берушілердің шағымдары мен талаптары, заңнама мен алаң талаптарының бұзылуы, қызметтердің сапасы мен уақтылылығы, түзету іс-шараларының орындалуы және өзге келісілген көрсеткіштер ескеріледі. Мониторинг нәтижелері бойынша мердігердің келесі мәртебесі туралы қорытынды және қажет болған жағдайда жауапты тұлғалар мен мерзімдері көрсетілген жақсарту бағдарламасы ресімделеді.

5.5. Компания мердігерлермен бағалау нәтижелері бойынша тұрақты диалог жүргізеді және келісілген түзету және жақсарту іс-шараларының тиімділігін бақылайды. Бағалау, мониторинг, хат алмасу, кездесулер және іс-шараларды жабу туралы құжатталған дәлелдемелер белгіленген тәртіппен сақталады.

5.6. Осы Тәртіпте белгіленбеген барлық мәселелер бойынша химиялық өнімді автомобиль көлігімен тасымалдау үшін мердігер ұйымдармен жұмыс істеу жөніндегі нұсқаулық қолданылады: 2005 CEFIC, ECTA, EPCA Guidelines on Subcontracting of Chemical Road Transport.